மைத்ரி மூவி மேக்கர்ஸ் (Mythri Movie Makers) நவீன் எர்னேனி மற்றும் Y. ரவிசங்கர் தயாரிப்பில், ராஜா கருப்பசாமி இயக்கத்தில், ரிஷிகாந்த் மற்றும் அனிஷ்மா அனில்குமார் நடிப்பில் வெளிவந்து ஃபேமிலி ஆடியன்ஸை ரொம்பவே கவர்ந்த படம்தான் 'மொத ராத்திரி'. இந்தப் படத்தில் பகவதி பெருமாள், சேட்டன், அப்துல் லீ, வெங்கடேஷ் எனப் பலரும் நடிச்சிருக்காங்க. இந்தப் படம் எப்படி இருக்கு? தமிழ் ஆடியன்ஸ் இந்தப் படத்தைக் கொண்டாடுவதற்கான காரணம் என்ன? என்பதைப் பற்றி விரிவாக அலசுவோம்.
படத்தின் கதைக்களம்
படத்தோட ஆரம்பத்துல ஊருக்கு ஒதுக்குப்புறமா இருக்கிற ஒரு சின்ன கோவிலைக் காட்டுகிறார்கள். அந்த கோவில்ல தான் நம்ம சேட்டன் பூசாரியாக வேலை பார்க்கிறார். சேட்டனைத் தவிர இந்தக் கோவிலை யாரும் பெருசா கண்டுகொள்ள மாட்டார்கள். இதனால், "பணக்காரங்க மத்த கோவிலுக்குப் போனா காசு கொடுத்து சாமி கும்பிடுறாங்க, இந்த சாமியை யாரும் மதிக்க மாட்டேங்குறாங்க" என்று தனக்குள்ளேயே புலம்புகிறார். அந்தப் பக்கமாகப் போகும் ஒரு குடும்பத்திடம், "இங்கே வந்து சாமி கும்பிட்டுப் போங்க" என்று சொல்ல, அவர்களோ "நாங்க கல்யாணத்துக்குப் போறோம், நேரமில்லை" என்று சொல்லிவிட்டுக் கிளம்புகிறார்கள். இதைக் கேட்ட சேட்டன், "என்னோட கடவுளை மதிக்காம போறீங்க, அதனால இந்தக் கல்யாணம் ஒழுங்கா நடக்காது" என்று சாபம் விடுகிறார். இந்த இடத்துல நாம இந்தக் கோவிலை நல்லா நோட் பண்ணிக்கணும்; ஏன்னா, படத்தோட பாதி கதை இந்தக் கோவிலைச் சுற்றித்தான் நடக்கப் போகுது.
அடுத்ததாக, ஹீரோவுக்கும் ஹீரோயினுக்கும் இரண்டு வீட்டிலும் பேசி கல்யாண ஏற்பாடுகளைச் செய்துகொண்டிருக்கிறார்கள். ஹீரோ மருது துபாயில் வேலை செய்துகொண்டிருப்பார்; ஹீரோயின் முத்து ஊரில் இருப்பார். துபாயில் இருக்கும் மருதுவை, 'மாமா பையனுக்கு காதுகுத்து' என்று பொய் சொல்லி ஊருக்கு வர வைக்கிறார்கள். ஏர்போர்ட்டில் இருந்து வரும் வழியில்தான், தனக்குக் கல்யாணம் பண்ணி வைக்கவே கூட்டிக்கொண்டு போகிறார்கள் என்ற விஷயம் மருதுவுக்குத் தெரியவருகிறது. இதனால் செம கடுப்பாகும் மருதுவை, அவரோட மாமா ஒருவழியாகச் சமாதானம் செய்து கல்யாணத்துக்கு சம்மதிக்க வைத்து வீட்டிற்குக் கூட்டிக்கொண்டு போகிறார்.
மறுபக்கம் ஹீரோயின் முத்துவுக்கு இந்தக் கல்யாணத்தில் கொஞ்சம் கூட இஷ்டம் இல்லை. அவர் வேறு ஒரு பையனைக் காதலித்துக்கொண்டிருக்கிறார். ஆனால், வீட்டிற்குப் பயந்து வேறு வழியில்லாமல் இந்தக் கல்யாணத்துக்கு ஒத்துக்கொள்கிறார். தனது காதலனிடம், "நாளைக்கு எனக்குக் கல்யாணம் நடக்கப் போகுது, அதுக்கு முன்னாடியே வந்து என்னை கூட்டிக்கிட்டுப் போயிரு. அப்படி இல்லன்னா தாலி கட்டின பிறகு, முதல் ராத்திரிக்கு முன்னாடியாவது வந்து கூட்டிக்கிட்டுப் போயிரு" என்று சொல்கிறார். இதைக் கேட்டு, காதலியைக் கூட்டிச் செல்வதற்காக அந்தப் பையன் தன் நண்பர்களிடம் உதவி கேட்கிறான். ஆனால் நண்பர்களோ, "உன்னைப் பார்த்துக்கவே உன்கிட்ட காசு இல்லை, இந்த லட்சணத்துல அவளைக் கூட்டிட்டு வந்து நீயும் கஷ்டப்பட்டு அந்தப் பொண்ணையும் ஏன் கஷ்டப்படுத்துற? அவ அந்த துபாய் மாப்பிள்ளையையே கல்யாணம் பண்ணி சந்தோஷமா இருக்கட்டும்" என்று அட்வைஸ் செய்கிறார்கள். ஆனால் அந்தப் பையன், "இல்ல, நான் முத்துவ உயிருக்கு உயிரா காதலிக்கிறேன்" என்று சொல்லிக்கொண்டு அவளை அழைத்துவருவதற்காக பைக்கை எடுத்துக்கொண்டு கிளம்புகிறான்.
இதற்கு நடுவில் மருதுவுக்கும் முத்துவுக்கும் கல்யாணம் நடந்து தாலியும் கட்டி முடித்துவிடுகிறார்கள்; இன்னும் அந்தப் பையன் வரவில்லை. கல்யாணம் முடிந்து வீட்டிற்குப் போனதும், இரண்டு வீட்டாரும் சேர்ந்து முதல் ராத்திரிக்கு ஏற்பாடு செய்கிறார்கள். மருதுவுக்கோ இதில் கொஞ்சம் கூட இஷ்டமில்லை. "முதல் ராத்திரியெல்லாம் இப்பவே தேவையில்லை, இன்னொரு நாள் பார்த்துக்கலாம்" என்று மாமாவிடம் சொல்ல, அவரோ கன்வின்ஸ் செய்து உள்ளே அனுப்பி வைக்கிறார். ரூமுக்குள் சென்றதும் மருது முத்துவிடம், "இப்போதைக்கு முதல் ராத்திரி எல்லாம் தேவையில்லை, நாம ஒருத்தர ஒருத்தர் புரிஞ்சுக்கணும், அதுக்கப்புறம் இதெல்லாம் பண்ணலாம்" என்று சொல்கிறார். முத்துவும் சரின்னு சொல்லிட்டு பாத்ரூம் போகிறார். பல மணி நேரமாகியும் முத்து வெளியே வராததால், பயந்துபோன மருது கதவை உடைத்துக்கொண்டு உள்ளே போய்ப் பார்க்கிறார். அங்கு முத்து பாத்ரூம் ஜன்னல் வழியாகத் தப்பித்துப் போக ட்ரை பண்ணிக்கொண்டிருப்பதைப் பார்த்து செம கடுப்பாகிறார். "இதெல்லாம் தாலி கட்டுறதுக்கு முன்னே சொல்றது இல்லையா? தாலியெல்லாம் கட்டி முடிஞ்ச பிறகு இன்னொருத்தனை லவ் பண்றேன், அவனோட ஓடிப்போறேன்னு சொன்னா எனக்கு எப்படி இருக்கும்?" என்று தன் கோபத்தின் உச்சத்தை வெளிப்படுத்துகிறார்.
கொஞ்ச நேரம் கழித்து சாந்தமாகும் மருது, "என்கூட வா" என்று சொல்லி முத்துவைக் கூட்டிக்கொண்டு, சேட்டன் பூசாரியாக இருக்கும் அந்த ஆலமரத்துக் கோவிலுக்குப் போகிறார். கொஞ்ச நேரம் கழித்து முத்துவோட காதலனும் அங்கு வருகிறான். ஆனால், அவனால் முத்துவைச் சந்தோஷமாக வைத்துக்கொள்ள முடியாது என்பதை உணர்ந்துகொண்டு, முத்துவை மீண்டும் மருதுவின் கையோடு சேர்த்து வைக்க ட்ரை பண்ணுகிறான். இதனால் கோபமடையும் முத்து, தன் காதலனைப் பளார் என்று அறைகிறார். "என்னால உன்னை சந்தோஷமா வெச்சுக்க முடியாது, இருந்தாலும் என் காதல் உண்மை. மருது கூடவே போ" என்று சொல்லிவிட்டு அந்தப் பையன் பைக்கில் தப்பியோட, மருது அவனைத் துரத்திக்கொண்டே பின்னால் ஓடுகிறார்.
இதற்கு இடையில், ரூமுக்குள் சென்ற பொண்ணையும் மாப்பிள்ளையையும் காணவில்லையே என இரண்டு வீட்டாரும் பதறிப்போய்த் தேட ஆரம்பிக்கிறார்கள். அப்போது, முத்து வேறொரு பையனைக் காதலித்த விஷயமும், மருதுவை ஏமாற்றி கல்யாணம் செய்து வைத்ததும் தெரியவர, இரண்டு குடும்பத்துக்கும் இடையே பெரிய சண்டை வெடிக்கிறது.
இதற்கு அப்புறம் என்ன நடந்தது? முத்துவும் மருதுவும் சேர்ந்தார்களா? குடும்பச் சண்டை எங்குப் போய் முடிந்தது? என்பதுதான் படத்தோட மீதிக்கதை.
படத்தின் ப்ளஸ் (Positives)
திரைக்கதை & இயக்கம்: படத்தோட முதல் பெரிய பலமே ஸ்கிரீன் ப்ளே தான். டைரக்டர் ராஜா கருப்பசாமி தன் வேலையைக் கச்சிதமாகப் செய்திருக்கிறார். தேவையான இடத்தில் காமெடி, தேவையான இடத்தில் எமோஷனல் என ஃபேமிலி ஆடியன்ஸை எப்படி எல்லாம் கவர முடியுமோ அப்படி எல்லாம் வித்தைகளை இறக்கியுள்ளார்.
சமூகக் கருத்து: காமெடி, எமோஷனலைத் தாண்டி நல்ல சமூகக் கருத்துக்களையும் பதிவு செய்திருக்கிறார். உதாரணமாக, மண்டப அலங்காரத்திற்காக வரும் ஒரு சிறுவன், அங்குள்ள ஒரு புல்லட் பைக்கைத் தொட்டுப் பார்ப்பான். முத்துவோட அப்பா அவனைத் திட்டி அனுப்பிவிடுவார். கடைசியில் முத்துவையும் மருதுவையும் தேடுவதற்காக அந்தப் பையனிடமே பைக்கை எடுத்துவரச் சொல்வார். அந்தப் பையன் கீழ் சாதி என்பதால், அவன் உடம்பில் உரசாமல் பின்னால் தள்ளி உட்கார்ந்து செல்வார். சாதி, மதம் என அலையும் மனிதர்களுக்கு இந்தக் காட்சியைப் பார்க்கும்போது ஒரு குற்ற உணர்ச்சி தோன்றும். அதேபோல ஆணவக் கொலைகள், சாதி பாகுபாடு பற்றியும் தைரியமாகப் பேசியிருக்கிறார் இயக்குநர்.
நடிகர்களின் நடிப்பு: 'இரும்புத்திரை', 'ஹீரோ' போன்ற படங்களில் துணை நடிகராக வந்த ரிஷிகாந்த், இதில் ஹீரோவாக அறிமுகமாகியுள்ளார். மருது கதாபாத்திரமாகவே ரசிகர்களின் மனதில் ஒன்றிவிட்டார். அதேபோல, 'யூத்' படத்தில் கனகாவாக வந்து மனதைக் கவர்ந்த அனிஷ்மா அனில்குமார், இதில் முத்துவாகக் கலக்கியிருக்கிறார். கல்யாண சீனில் இவர் ஆடும் டான்ஸுக்கு தியேட்டரில் நல்ல வரவேற்பு. எமோஷனல் காட்சிகளிலும் எதார்த்தமான நடிப்பை வெளிப்படுத்தியுள்ளார்.
காமெடி & இசை: பகவதி பெருமாளின் காமெடி கலந்த நடிப்பு பல இடங்களில் நின்னு பேசுகிறது; இவருடைய காமெடிக்குத் தியேட்டரில் நல்ல சிரிப்பலைகள் எழுகின்றன. பரத் சங்கரின் பின்னணி இசை (BGM) படத்திற்குப் பெரிய பலம். பாடல்கள் பெரிதாக ஹிட்டாகாவிட்டாலும், காமெடி மற்றும் எமோஷனல் காட்சிகளுக்கு என்ன தேவையோ அதைப் பக்காவாகக் கொடுத்து உயிர் சேர்த்துள்ளார் பரத் சங்கர்.
படத்தின் மைனஸ் (Negatives)
படத்தோட மைனஸ் என்று பார்த்தால் பெரிதாகக் குறைசொல்ல ஒன்றுமில்லை. முதல் பாதியை ஜாலியாகவும் கலகலப்பாகவும் நல்ல வைப்போடு கொண்டுபோனவர்கள், இரண்டாம் பாதியை முழுவதுமாக எமோஷனலாகக் கொண்டு செல்கிறார்கள். ஒரு கட்டத்தில் படம் இப்படித்தான் முடியப்போகிறது என்பதை எளிதாக ஊகிக்கக் கூடியதாக (Predictable) இருக்கிறது. பெரிதாக எந்த ட்விஸ்ட்டும் இல்லை; அடுத்து வரப்போகும் காட்சிகள் இப்படித்தான் இருக்கும் என முன்னதாகவே கணிக்க முடிவதுதான் இந்தப் படத்தில் உள்ள ஒரே மைனஸ்.
இறுதித் தீர்ப்பு மற்றும் பாக்ஸ் ஆபிஸ்
IMDb ரேட்டிங்: 8.9/10 (இது மிகச் சிறந்த ரேட்டிங்).
பாக்ஸ் ஆபிஸ்: சுமார் 4 கோடி ரூபாய் பட்ஜெட்டில் உருவான இந்தப் படம், இதுவரை 4.18 கோடி ரூபாய் வசூல் செய்துள்ளதாக அறிவிப்புகள் வெளியாகியுள்ளன.
OTT ரிலீஸ்: படத்தின் ஓடிடி (OTT) வெளியீடு பற்றி இப்போதைக்கு எந்த அறிவிப்பும் இல்லை.
எந்தவொரு ஆபாசமும் இல்லாமல் நல்ல திரைக்கதை, காமெடி, எமோஷனல் என அனைத்தும் நிறைந்த, ஃபேமிலி ஆடியன்ஸுக்கு ஏற்ற தரமான படம்தான் இந்த "மொத ராத்திரி" (Modha Raathri). இதுபோன்ற சிறிய பட்ஜெட் படங்களைப் பலரும் தியேட்டரில் சென்று பார்க்கத் தயங்குவார்கள்; ஆனால், தியேட்டரில் சென்று பார்த்துக் கொண்டாட வேண்டிய தரமான திரைப்படம்தான் இது!
இதுபோன்று சினிமா விமர்சனங்களை உடனுக்குடன் படிக்க ஆர்கே மூவி டாக்கிஸ் (RK Movie Talkies) தளத்தைத் தொடர்ந்து ஃபாலோ செய்யவும்.
கருத்துகள் இல்லை:
கருத்துரையிடுக